【長輩相處之道】成日覺得雞同鴨講?

由「長輩圖」出發,帶佢哋走入科技世界

「認同請分享」。

科技越嚟越發達,長輩未必可以跟上時代步伐,但當佢哋都嘗試用智能手機,學習利用WhatsApp同子女、孫仔孫女溝通,目的只有一個,就係唔希望同晚輩有代溝,畀佢哋多啲關心。

別樹一格嘅長輩圖,並唔係時下年青人著重嘅美感元素為首要條件,佢哋在意嘅係圖中文字有無包含「正面」或「歸屬感」嘅意思,因為長輩都希望傳遞「連結自己、連結別人」嘅信息。

無論三歲定八十,你仍然係「小朋友」

「我大個㗎喇,我識得照顧自己。」

唔知呢句說話,你有無試過對住屋企嘅長輩講過?無論你係三十歲定四十歲嘅時候講,長輩都一樣會回覆:「你細個嘅時候我係點照顧你嘅?你應該要聽我講!」

換個角度睇,其實長輩喺我哋心目中都係一個「小朋友」。佢哋好容易滿足,只要我哋多問候幾句,多陪佢哋食飯,多分享關於自己嘅生活畀佢哋聽,等佢哋唔好覺得同你有隔膜,咁佢哋就開心喇!

覺得長輩好㒼塞?唔聽人講?

由唔鐘意嘅人口中講十次百次,都係咁唔順耳!

當我哋希望長輩改變時,不如先企喺佢哋角度諗一諗!好多時佢哋唔係唔想作出改變或調整自己,而係我哋忽略咗佢哋嘅感受,因為佢哋都好需要被理解、被尊重同被認同。

諗返轉頭,好多子女會過分著緊而表現出唔耐煩,責罵父母;同時間父母又會覺得子女唔明白佢哋,不但唔可以解決問題,問題仲會一直加深。

一句說話,唔同語氣,可以有唔同結果。

1.「整親隻腳就抖多啲啦,成日行嚟行去,一陣又跌倒入院就麻煩。」

2.「你隻腳整親要休息多啲,不如坐喺到陪我睇下電視。」

將心比己,選擇一啲對方覺得舒服又自然嘅態度對待,先可以避免影響同長輩嘅關係。

zh_HK