究竟咩係肌少症？
肌少症即係「肌肉減少症」，指肌肉量同力度漸漸減少，繼而影響患者日常生活，甚至影響自理能力，係一種全身性肌肉及骨骼疾病。病徵包括：
- 肌肉數量逐漸減少
- 肌肉力量減弱
- 肌肉韌度變差
- 身體平衡力下降
點解肌肉損失得咁快？
- 好多人都因為長時間工作坐得耐，無咩點郁，或者老人家成日都只係坐喺梳化或瞓喺床，肌肉就容易快速流失。
- 許多長者可能係因為牙齒唔好，懶得煮都懶得落街買，搞到自己食慾降低，搞到卡路里同蛋白質都唔夠，就好難維持肌肉嘅質量。
- 如果身體嘅激素同睪固酮等嘅濃度唔夠，就會令體內蛋白質合成嘅速度比被分解嘅速度更慢，身體肌肉嘅收縮活動會比較差。
預防肌少症，由【食】同【做】開始
適量嘅運動同攝取足夠嘅營養對於預肌少症係相當重要嘅方法！
【食】撇除運動量大同健身人士，成人每日最低需求大約每公斤體重攝取 1 克蛋白質。一位 50 公斤嘅成年人需要攝取 50 克質白質以維持肌肉，而食優質嘅蛋白係好重要，亦都好簡單，例如牛肉、雞肉、雞蛋、魚等等。
【做】「用進廢退」喺人體嘅生理機能，兩三個星期唔用肌肉已經開始會萎縮，長期缺乏運動，肌肉自然離你而去。無運動習慣嘅老人家可以先選擇低強度有氧運動，提高心肺功能及耐力，例如散步、慢跑、耍太極、踩單車機等等，慢慢適應運動習慣。
